Unu el la plej oftaj demandoj, kiujn ne-Esperantistoj demandas al Esperantistoj, certe estas: “kiom da homoj kiel vi – kiuj parolas aŭ eklernis Esperanton – ekzistas en la mondo ?” [1]. Kiam oni parolas al ido Esperanton, la demando similas: “Kiom da aliaj idoj denaske parolas Esperanton?“. Tiujn temojn multe traktis aliaj Esperantistoj. Mi resumas en ĉi-tiu afiŝo la datumojn kaj precipe personajn vidpunktojn pri la nombro de denaskuloj en la mondo.
Por respondi al tiu demando, mi celis nombri ĉiujn afiŝojn, sciencajn artikolojn, librojn kaj retpaĝojn, kiuj traktis tiun demandon. Mi do tajpis en retserĉilo tiujn vortojn, en la franca, angla kaj Esperanta: “denaskuloj”, “denaskaj parolantoj”, “Esperanto native speakers”, “espérantophones natifs”. Mi kiel eble plej ofte provis legi la unuagradajn fontojn sed tio ne estis facila tasko, ĉar multe da artikoloj ne estas rete atingeblaj.
Ekzistas tri ĉefaj metodologiaj problemoj por respondi al tiu demando:
- Kiel difini kio estas denaskulo? Ekz., ĉu iu kiu denaske aŭdas la lingvon, aŭ ĉu iu kiu denaske aŭdas la lingvon kaj parolas ĝin flue kiam ĝi estas plenkreskulo? Oni devus precizi nian uzatan difinon de “denaskulo” kiam oni proponas nombron pri ili. Ne ĉiuj faris tion.
- Ne ekzistas tutmondaj esploroj pri la nombro de Esperanto-denaskuloj. Nur Hungario iam nombris ilin nacianivele.
- Homoj kelkfoje ne klarigas precize kiel ili nombris, aŭ ĉu ili donas la nunan aŭ ĉiutempan nombron.
Ni do kompreneble ne havos precizan respondon al nia demando. Tamen, mi kolektis en la ĉi-suba tabelo ĉiujn nombrojn proponitajn pri la temo. Laŭ tiuj informoj, ni povas esti certaj ke nuntempe ekzistas en la tuta mondo pluraj centoj da idoj, kiuj kreskis en familio kiu uzas/uzis Esperanton kiel unu el la hejmaj lingvoj, kaj verŝajne ne pli ol 2.000. Ili estas inter <1% kaj 4,5% de la Esperanta-parolantaro.
Atentu, multaj indikas nur almenaŭan nombron da denaskuloj kaj ne tutan nombron (ekz., tiuj kiuj nombras kiom da homoj partoprenis en okazaĵoj por denaskuloj). Aliaj indikas procentoj da denaskuloj laŭ la tuta Esperantista-parolantaro (x%). Plie, kelkaj indikas nur nombron da idoj, aliaj indikas nombron da familioj kiuj uzas Esperanton kiel denaska lingvo (ĉu gepatroj, ĉu idoj, ĉu geavoj). Fine, kelkaj indikas nombrojn da idoj kiuj uzas Esperanton hejme, sed eble ne kiel denaska lingvo (ekz., tiuj kiuj nombras kiom da infanoj partoprenis en porinfana kongreso).
Tabelo: Nombro da denaskuloj kaj Esperantistaj familioj en la tuta mondo (lasta ĝisdatigo: 18-an de marto 2019).
Nombro | Dato | Metodo | Fontoj |
146 | 2019 | Denaskuloj kiuj uzas Amikumu (aplikaĵo) | Amikumu |
116 | 2019 | Homoj en REF-listo | REF-listo |
236 | 2019 | Homoj en Denask-listo | Denask-listo |
34 | 2001-2018 | Infanoj kiuj partoprenis en Internacia Infana Kongreseto, min.=5, maks.=66, averaĝo=34, mediano=42 | Vikipedio |
22 | 1979-2018 | Familioj kiuj partoprenis en Renkontiĝo de Esperantistaj Familioj, min.=5, maks.=26, averaĝo=22, mediano=13,5 | Vikipedio |
1.000-2.000 | 2016 | Persona taksado | Iu en Stackexchange |
1.000 | 2015 | Laŭ antaŭa persona taksado de Lindstedt | Prelego pri interlingvistiko |
7 (2 %) | 2014 | Kalkulo laŭ nombro da vikipedio-kunlaborantoj, kiuj indikis almenaŭ nivelon 3 en Esperanto | Vikipedio |
200-2.000 (<1%) | 2009 | Ne menciata | Liberafolio |
9 (4,5%) | 2008 | Kalkulo laŭ nombro da vikipedio-kunlaborantoj, kiuj indikis almenaŭ nivelon 3 en Esperanto | Vikipedio |
20-25 | 2007 | Nombro da denaskuloj kiuj partoprenis en Novjara Renkontiĝo | Vikipedio |
2.000 | 2004 | Persona taksado | Scienca artikolo de Corsetti et al., 2004 |
Pluraj miloj | 2002 | Ne menciata | Vikipedio laŭ Haarmann |
13 | 2001 | Hungaroj malpli aĝaj ol 9-jaroj kiuj parolas Esperanton laŭ hungara esploro | Vikipedio laŭ Hungara censo |
168 (3,7%) | 2001 | Hungara esploro nombris entute 4 575 Esperanto-parolantojn, el kiuj 4 407 homoj informis, ke Esperanto estas negepatra lingvo | Vikipedio laŭ Hungara censo |
350 | 1996 | Persona taksado : familioj en kiu Esperanto estas parolata kiel la ĉefa lingvo por ĉiaj komunikadoj | Scienca artikolo de Corsetti, 1996 |
1.000 | 1996 | Persona taksado | Vikipedio laŭ Sikosek, 2003 kaj Lindsted, 1987 |
283 | 1995 | Nombro da familioj kiuj ricevis la Cirkulaĵon por Esperantlingvaj Familioj kaj Paroj | Scienca artikolo de Corsetti, 1996 |
1.000 | 1994 | Persona taksado | Stackexchange laŭ Hana, 1998 kaj Funk et al., 1994 |
200 | 1987 | Persona taksado : familioj en kiu Esperanto estas parolata kiel la ĉefa lingvo por ĉiaj komunikadoj | Scienca artikolo de Corsetti, 1996 |
83 | 1965 | Enketo publikigata en Gepatra bulteno pri la nombroj da infanoj edukitaj per Esperanto | Scienca artikolo de Corsetti, 1996 laŭ Gepatra bulteno, 1957 |
67 | 1962 | Laŭ listoj da nomoj aperintaj en Gepatra bulteno | Vikipedio laŭ Bodnarove, forumo Esperanto.sk |
58 | 1961 | Laŭ listoj da nomoj aperintaj en Gepatra bulteno | Vikipedio laŭ Bodnarove, forumo Esperanto.sk |
154 | 1957 | Laŭ listoj da nomoj aperintaj en Gepatra bulteno | Vikipedio laŭ Bodnarove, forumo Esperanto.sk |
1.000-10.000 | Nekonata | Persona taksado laŭ datumoj pri nombroj da alialingvaj denaskuloj | Vikipedio |
(1%) | Nekonata | Ne menciata | Vikipedio |
Mi ĝisdatigos la informojn alireblajn ĉe Vikipedio laŭ tiu kolektado. Bonvolu diri al mi se mi forgesus fonton pri la temo. Mi plezure legos ĝin kaj aldonos ĝin tie, kaj tiel povos pli precize ĝisdatigi la Vikipediajn paĝojn.
Noto
[1] La plej freŝa, serioza kaj leginda artikolo pri la nombro de Esperantistoj en la mondo miaopinie estas tiu: Kalkulinda (Svend), La nombro de parolantoj de Esperanto en la mondo, 2018, rete legebla.
Reblogged this on Interlingvistiko Universitate: Amsterdamo k Torino.
ŜatiŜati
Fakte, baze je Lindstedt, mi skribis 1000 en jaro 2015 dum mia inaŭgura parolado. Vi povas legi ĝin kaj laŭvole aldoni la fonton al via tabelo. Jen la rekta deŝut-adreso: http://www.oratiereeks.nl/upload/pdf/PDF-5267weboratie_Gobbo_-_DEF.pdf
ŜatiŜati
Dankon Federico, mi ĵus aldonis ĝin.
ŜatiLiked by 1 persono